ଆନୁଷ୍ଠାନିକ ତାଲିମ ବିଷୟରେ 

ରାଜ୍ୟର ହସ୍ତଶିଳ୍ପ ପରମ୍ପରାକୁ ବଜାୟ ରଖିବା ପାଇଁ କାରିଗର ମାନଙ୍କର ଦକ୍ଷତା ବିକାଶ ନିମନ୍ତେ ପ୍ରଶିକ୍ଷଣ ପ୍ରଦାନ ଏକ ମୌଳିକ ଆବଶ୍ୟକତା। ଏହାକୁ ବିଚାର କରି ସିଡାକ୍‌ କାରିଗର ମାନଙ୍କ ପାଇଁ ହସ୍ତଶିଳ୍ପ ପ୍ରଶିକ୍ଷଣ ପାଠ୍ୟକ୍ରମ ପ୍ରଦାନ ନିମନ୍ତେ ବ୍ୟବସ୍ଥା କରିଛି। ଏହା କାରିଗର ମାନଙ୍କୁ ଏକ ସୁସଙ୍ଗଠିତ ପ୍ରଣାଳୀରେ ହସ୍ତଶିଳ୍ପ କାରିଗରୀକୁ ବୁଝିବାରେ ସାହାଯ୍ୟ କରିବା ସହିତ ସେମାନଙ୍କୁ ହସ୍ତଶିଳ୍ପ ଉତ୍ପାଦନରେ ନିୟୋଜିତ ଫାର୍ମଗୁଡ଼ିକରେ ବେତନ ବା ପାରଶ୍ରମିକ ସହିତ ନିଯୁକ୍ତି ପାଇଁ ଯୋଗ୍ୟ ବିବେଚିତ ହୋଇପାରିବେ କିମ୍ବା ଆତ୍ମନିଯୁକ୍ତି ସୃଷ୍ଟି କରିବାରେ ସହାୟକ ହେବ। ଏଥିସହିତ ଏହି ପାଠ୍ୟକ୍ରମ ଗୁଡିକର ଲକ୍ଷ୍ୟ ହେଉଛି ପରିବର୍ତ୍ତିତ ବଜାର ପରିସ୍ଥିତି, ମାର୍କେଟିଂର ନୂତନ ସୁଯୋଗ, ନୂତନ ଡିଜାଇନ୍‌, ରପ୍ତାନି ଚିନ୍ତାଧାରା ଇତ୍ୟାଦି ବିଷୟରେ ପ୍ରଶିକ୍ଷାର୍ଥୀ ମାନଙ୍କର ସଚେତନତା ସ୍ତରକୁ ବିସ୍ତାରିତ କରିବା। ଏହି ତାଲିମ କାର୍ଯ୍ୟକ୍ରମ ଗୁଡ଼ିକ ମଧ୍ୟ ଏକ ପ୍ରକାର କାରିଗରୀ ଦକ୍ଷତାର ମୂଳଦୁଆକୁ ଅଧିକ ଦୃଢ଼ କରିଥାଏ ଫଳରେ ଏହା ଭବିଷ୍ୟତରେ ରାଜ୍ୟର ହସ୍ତଶିଳ୍ପ ପରମ୍ପରାକୁ ସଂରକ୍ଷଣ କରିବାରେ ଏବଂ ପରବର୍ତ୍ତୀ ପିଢ଼ି ପର୍ଯ୍ୟନ୍ତ ଏହାକୁ ଆଗକୁ ବହନ କରିବାରେ ସାହାଯ୍ୟ କରିଥାଏ।

ରାଜ୍ୟ ସ୍ତରରେ, ଭୁବନେଶ୍ୱର ଖଣ୍ଡଗିରି ସ୍ଥିତ ଗଣ୍ଡମୁଣ୍ଡାର ହସ୍ତଶିଳ୍ପ କମ୍ପ୍ଲେକ୍ସରେ ତାଲିମ ଦିଆଯାଉଛି। ସେହିଭଳି ଖୋର୍ଦ୍ଧା ଜିଲ୍ଲାର କେନ୍ଦୁବିଲ୍ୱ ଠାରେ (ପଟ୍ଟଚିତ୍ର), କଟକ ଜିଲ୍ଲାର ଆଠଗଡ ଠାରେ(ପଟ୍ଟଚିତ୍ର), ପୁରୀ ଜିଲ୍ଲାର କୋଣାର୍କ ଠାରେ (ପଥର ଖୋଦନ) ମଧ୍ୟ ତିନୋଟି ଜିଲ୍ଲାସ୍ତରୀୟ ତାଲିମ କେନ୍ଦ୍ର କାର୍ଯ୍ୟ କରୁଛି।